Пасьля нядаўніх інцыдэнтаў з дронамі, якія заляцелі зь Беларусі, кіраўніцтва літоўскага войска патлумачыла, чаму іх ня зьбілі. І расказала, што робіць для паляпшэньня абароны, паведаміла LRT.
Чаму ня зьбілі дрон, які, паводле відавочцаў, праляцеў над Вільняй
- Наяўныя сыстэмы не заўсёды бачаць малыя дроны або зусім іх не фіксуюць.
- Каб зьбіваць аб’екты ў паветры, патрэбна візуальнае пацьверджаньне, што гэта пагроза.
- Загад можа даць толькі міністар абароны ці ўпаўнаважаны кіраўнік войска.
- Працэдура займае час, а дроны маюць хуткасьць да 200 км/г і да Вільні могуць даляцець за некалькі хвілін.
- Ва Ўкраіне вялікая тэрыторыя дае час для візуальнай ацэнкі і прыняцьця рашэньняў. У Літве часу на рэакцыю менш.
Што зробяць?
- Купяць новыя радары для малых аб’ектаў.
- Усталююць «сухаземныя санары», што распазнаюць дроны з гуку.
Войска схіляецца да таго, каб зьбіваць дроны кулямётамі 50-га калібру, а не марнаваць на іх ракеты.
Дроны зь Беларусі за ліпень двойчы заляталі ў Літву
28 ліпеня раніцай у Літву заляцеў неапазнаны дрон, яго заўважылі ў Вільні. Паліцыя разаслала жыхарам Вільні sms-папярэджаньні. Дрон дагэтуль не знайшлі, і нават зьявілася вэрсія, што яго ўвогуле не было. Аднак гэтаму запярэчылі відавочцы.
10 ліпеня дрон дакладна быў. Ён пераляцеў мяжу на вышыні 100 мэтраў з хуткасцю 50-60 км/г і ўпаў прыкладна за кілямэтар ад яе. Выбухоўкі ці грузу на ім не было. Экспэрты пазналі ў ім танную мадэль «Гербера», якая выкарыстоўваецца расейцамі для дэзарыентацыі супрацьпаветранай абароны.
Форум